Rainer Nikowitz: Budgetverhandlungen

HC: Duhu, Schatzi? I würd mir gern a Stangen Tschick kaufen. Philippa: Ja und?

HC: Na ja Weißt eh! Philippa: Ah so. Bin i a russische Oligarchin oder was? I hab dir doch erst was geben!

HC: I hab , äh, unvorhergesehene Ausgaben ghabt. Philippa: Und zwar welche?

HC: Bin i dir etwa Rechenschaft schuldig? Philippa: Wart, lass mi kurz nachdenken Ja!!

HC: I hab a neues Sakko braucht. Fürs Fernsehen! Philippa: San die anderen 50 leicht nimmer gut genug? Oder am End zu eng?

HC: I hab bitte wieder abgnommen! Des war nur kurzfristig, wegen dem Frust. Philippa: Und den Tonnen von Chips beim Nachmittagsfernsehen.

HC: Neue Schuh hab i a braucht. Philippa: Geh, bitte! Des is in einem Alleinverdienerinnenhaushalt einfach net drin, dass du dir dauernd neues Klumpert kaufst!

HC: Aber was soll i denn machen? Philippa: Such dir endlich a Hackn!

HC: Im Herbst bin i dann eh im Gemeinderat. Philippa: Sagt wer?

HC: Mei untrüglicher politischer Instinkt. Philippa: Da weiß der aber mehr als die Umfragen. Du liegst grad einmal bei schlappe fünf Prozent. Und scho 4,9 wären zu wenig.

HC: I hab Erfahrung. I spür des. Philippa: Ja. Da gibt's glaub i irgendwo a Sieben-Stunden-Video, wo ma genau sieht, was du alles spürst.

HC: Wie oft wärmst die Gschicht denn no auf? Philippa: Jedes Mal, wenn du a Geld brauchst.

HC: Da muss i wohl durch ... Aber was is jetzt mit meine Tschick? Philippa: Wer war bei der Hochzeit noch einmal schnell für Gütertrennung?

HC: Na ja ... Ich. Philippa: Oft hast a Pech!